- ఆ దేశ రాయబారిరువెన్ అజర్తో భేటీ
- ఏఐ, సైబర్సెక్యూరిటీలో తోడ్పాటు అందించాలని విజ్ఞప్తి
- స్కిల్ వర్సిటీలో యువతకు శిక్షణ ఇవ్వాలని విప్రోను కోరిన మంత్రి
హైదరాబాద్, వెలుగు: మూసీ ప్రక్షాళనకు ఇజ్రాయెల్ టెక్నాలజీ వాడుతామని, ఇందుకోసం ఆ దేశం ముందుకు వచ్చిందని ఐటీ శాఖ మంత్రి శ్రీధర్ బాబు తెలిపారు. మురికినీటిని శుద్ధిచేసి తిరిగి వాడుకునేందుకు మూసీశుద్ధి ప్రాజెక్టు చేపట్టామని, అందుకు సహకరించాల్సిందిగా ఇజ్రాయెల్ రాయబారి రువెన్ అజర్ను కోరగా.. ఆయన సంసిద్ధత వ్యక్తం చేశారని మంత్రి వెల్లడించారు. శుక్రవారం సెక్రటేరియెట్+లో మంత్రితో రువెన్ అజర్ సమావేశమయ్యారు.
ఏఐ, సైబర్ సెక్యూరిటీలో రాష్ట్రానికి సహకరించాలని మంత్రి శ్రీధర్బాబు కోరారు. రక్షణ రంగం, వ్యవసాయం, నీటి వినియోగంలో ఆధునిక పద్ధతులపైనా తోడ్పాటు అందించడంపై చర్చించారు. 200 ఎకరాల్లో ఏర్పాటు చేయనున్న ఏఐ సిటీ గురించి వివరించారు. రాష్ట్రంలో యంగ్ ఇండియా స్కిల్ యూనివర్సిటీ ఏర్పాటు చేశామని, ఇజ్రాయెల్ ఎలాంటి ఇండస్ట్రీని పెట్టాలన్నా ప్రతిభ కలిగిన యువత సిద్ధంగా ఉన్నారని చెప్పారు. కాగా, మౌలిక వసతుల కల్పనలో రెండు దేశాల పరస్పర సహకారం అవసరమని ఇజ్రాయెల్ రాయబారి రువెన్ ప్రతిపాదనలకు మంత్రి ఓకే చెప్పారు.
సీఎం రేవంత్ రెడ్డితో కలిసి ఇజ్రాయెల్లో పర్యటించాల్సిందిగా శ్రీధర్బాబుకు రువెన్ ఆహ్వానించారు. ఇటు టర్కీ రాయబారి ఫిరట్ సునెల్తోనూ మంత్రి సమావేశమయ్యారు. అరగంట సేపు పరస్పర సహకారంపై చర్చించారు. తెలంగాణ, టర్కీ మధ్య చారిత్రక, సాంస్కృతిక సంబంధాలు ఎంతో కాలంగా కొనసాగుతున్నాయని శ్రీధర్ బాబు అన్నారు. వ్యవసాయం, ఫార్మా లైఫ్సైన్సె స్, వాణిజ్య రంగాల్లో పెట్టుబడులకు అనుకూల వాతావరణం ఉందన్నారు.
స్కిల్ యూనివర్సిటీలో భాగం కండి
రాష్ట్ర ప్రభుత్వం ప్రతిష్ఠాత్మకంగా చేపట్టిన స్కిల్ యూనివర్సిటీలో భాగం కావాలని విప్రో చీఫ్ ఫైనాన్షియల్ ఆఫీసర్ రాఘవ్ స్వామినాథన్ను శ్రీధర్ బాబు కోరారు. సంస్థ కార్యకలాపాల పురోగతిపై సెక్రటేరియెట్లో మంత్రితో రాఘవ్ స్వామినాథన్ భేటీ అయ్యారు. స్కిల్ యూనివర్సిటీలో భాగమై యువతకు శిక్షణ ఇచ్చేందుకు తోడ్పడాలని, తద్వారా ప్రతిభ కలిగిన మానవ వనరులను వినియోగించుకునేందుకు అవకాశం ఏర్పడుతుందని మంత్రి వివరించారు. డాక్టర్ రెడ్డీస్ ల్యాబ్స్ ఇదే తరహాలో 80 మంది యువతకు తమ అవసరాలకు తగినట్టు శిక్షణ ఇస్తున్నదని తెలిపారు.
4న పెద్దపల్లిలో 9వేల మందికి నియామక పత్రాలు
డిసెంబర్ 4న పెద్దపల్లిలో నిర్వహించే యువశక్తి సభకు సీఎం రేవంత్ రెడ్డి వస్తారని, దాదాపు 9000 మందికి ఉద్యోగ నియామక పత్రాలను అందిస్తారని మంత్రి శ్రీధర్ బాబు తెలిపారు. సభ ఏర్పాట్లపై శుక్రవారం సచివాలయంలో మంత్రి ఉన్నతస్థాయి సమావేశం నిర్వహించారు. స్కిల్ యూనివర్సిటీలో భాగస్వామ్యమయ్యే 7 ఏజెన్సీలతో ఒప్పంద పత్రాలపై సంతకం చేస్తారని, సీఎం కప్ తో పాటు వందలాది కోట్ల రూపాయల విలువైన అనేక కార్యక్రమాలను సీఎం ప్రారంభిస్తారని మంత్రి వివరించారు.
